[تجربة شخصيه] كيف تعلمت اللغه الانجليزيه واتقنتها من الصغر 👀🤷 ؟

اللهم صلي وسلم على سيدنا محمد  وعلى آله وصحبه اجمعين ...

بسم الله وبه نستعين 

[تنويه مهم ⚠️ : هذا الموضوع مو ماده اعلانيه ابدا أي انه ليس بأعلان :) كتبتها فقط كتجربه شخصيه مني ما أعلن لأي موقع أو شيء مذكور فالموضوع تحت]

مثل ما شفتوا فالعنوان فوق , قررت اكملكم اليوم عن كيف أني تعلمت اللغه الانجليزيه وبدأت بتعلمها منذ الصغر وليس الكبر ....

كبدايه للتوضيح فقط انا ما عندي أي عرق اجنبي , امي وابوي من العرب مو من برا عشان ما تقولون غشيتكم وطلعت الانجليزيه لغتها الأم اصلا 😂 

انا السبب الأول لتعلمي من الصغر هي البيئة ثم البيئة ثم البيئة لها دور كبيييير 

انا تربيت في بيئة اغلب اللي فيها متمكنين من اللغه الانجليزيه منهم اخواتي وابوي 💘

هذا الشيء ساعدني وما حصلت صعوبه اني اتعلم اللغه وانا توني اول ابتدائي , طبعا بديت اتعلم الاساسيات فقط لكن سنه وراء سنه لغتي تتحسن وتتحسن واتعلم مفردات كثييييره وانا اطمح للمزيد طبعا

والسبب الثاني اللي خلاني اتقن اللغه هو المسلسلات والأفلام ولحد يستغرب لانه تأثيرها قوي للي يبغا يتعلم اصلا ✅ .

شلون انا بشرحلكم يعني اللي يشوف فلم عشان يضيع وقت ويتسلى مو نفس اللي يشوف عشان يتسلى ويتعلم في نفس الوقت

وطبعا هنا ما اتكلم عن مسلسلات وافلام معقده شوي لغويا لا اتكلم عن المسلسلات البسيطه اللي تصنيفها حق 13+ او 7+ وفوق لان كلامهم مو مره معقد ومركب فوق بعض

او انه مخصص لشيء معين , مثلا مسلسل يخص الجنائيات والجرائم مو نفس مسلسل يختص بالطب لانه كل مسلسل بتحصلون فيه مصطلحات تخص قصته 

يعني المسلسل الطبي بتحصلون فيه اكثر كلامهم مصطلحات طبيه ونفس الشيء للباقي وكذا الواحد بيتشتت خاصه اذا كان ما يعرف الاساسيات وحرفيا فاشل فاللغه ما يعرف غير يس و نوو 😃❌.

وكطريقه ممكن تساعدكم :

* هاتو ورقه وقلم معكم وشوفوا مسلسلكم طبعا مترجم بالعربي واكتبوا اي كلمه ما فهمتوها او ما تعرفون معناها ومترجم جوجل ما رح يقصر واذا على الأملاء نتفلكس بيساعدكم اذا كنتوا تشوفون بنتفلكس لانه في ترجمه انجليزيه وعربيه .

* على الاقل الحلقه الوحده رح تستخرج منها عشرات وممكن المئات حتى من الكلمات والموضوع صعب بالبدايه بس ترا مو تكتب بس تسمعهم وهم يتكلمون رح تترسخ الكلمه بذهنك أكثر والنطق له دور كبير النطق جدا مهم ✅✅.

بعد فتره بتلاحظون لغتكم صارت قويه , حولوا من ترجمه عربي لترجمه انجلش وما رح تواجهون أي مشكله وتذكروا كلامي لانه خلاص تعودتو وتعلمتو لغه جديده

واهم شيء تكتبونها بالورقه لان على ما تخلص الحلقه الا انت ناسي الكلمه وتراجعهم دايما بأستمرار ومع الايام ما رح تحتاج لا ورقه ولا قلم ولا حتى ترجمه عربيه !!

طيب انا ابي ابدي من الصفر لاني ما اعرف ولا شيء حرفيا ولا شيء عن اللغه ؟؟

انصحكم بقوه بالمواقع مثل duolingo وهو موقع الكتروني وتطبيق تقدرون تحملونه بالفون , بصراحه من تجربتي فيه اسبوع واحد وتجربه ناس اعرفهم شخصيا اكتشفت انه فقط يعلم الأساسيات اي الكلمات الاساسيه في اللغه وهو ما يعلم الانجليزيه بس يعلم لغات ثانيه

كيف يعني كلمات اساسيه ؟ يعني بس الكلمات اللي نحتاجها مثلا لما نروح مطعم او نشتري من محل , مثل ما عندنا في اللغه العربيه اساسيات هم حتى , لكن اذا جينا للغه نفسها نلقاها واسعه جدا جداااا 

وهذا هو المطلوب انه ما نتعلم الاساسيات بس ونكتفي فيها , نتطور ونتعلم مفردات جديده اذا مو كل يوم كل اسبوع على الاقل !

عشان كذا هذا البرنامج مخصص للي يبدون من الصفر لانه جدا مفيد من هذي الناحية هو يبني لك الأساس في اللغه الانجليزيه بعدين يبدأ يعلمك كلمات ثانيه .

بعد ما تخلص منه وتتعلم الاساسيات اتجه للأجانب نفسهم , شوف فيديواتهم حاول بدون ترجمه عربي واذا ما قدرت ابدا حط ترجمه عربي لكن حط في بالك انك تشوف وتتعلم وتسمع , عشان كذا اقترحت لكم موضوع الافلام والمسلسلات مفيده جدا وانا عن نفسي تعلمت كثير كثييير منها ولها فضل كبير .

طيب انتي تحطين ترجمه عربي ؟

طبعا اقدر اكذب عليكم واقول لا ما احط بس ايوا احط انا 😂 لاني ما زلت في مرحله التعلم لكني وصلت لحد جيد مقارنه بمن في عمري وسني :)

يعني بعدني اتعلم كلمات جديده بس صراحه بيني وبينكم مرات لا ما احط اشوف كذا عادي وما عندي اي مشكله اكون فاهمه ✅

يختلف على حسبي انا هل اكون في مزاج يخليني استوعب الناس اللي تتكلم قدامي ولا لا 😂

انتهى الموضوع اتمنى انه نال على إعجابكم 💘 اذا اعجبكم انشروه في كل مكان لأصحابكم واصدقائكم ومعارفكم ✅.